१२ वैशाख, सल्यान । एकीकृत नेकपा माओवादीका अध्यक्ष पुष्पकमल दाहाल प्रचण्डले नेपालको विकासमा सहयोग नगरे भारतको सुरक्षा चिन्तालाई सम्बोधन नगर्ने धक्की दिनु भएको छ । सल्यानको वाफुखोलामा बिहीबार आयोजित सभामा प्रचण्डले भारत भ्रमणको क्रममा नेपालको आर्थिक विकासका लागी कुरा उठाउने बताउनु भयो ।

उहाँले भन्नुभयो-’मैले चीन भ्रमणको क्रममा पनि यहि कुरा उठाएको हूँ र भारत भ्रमणको क्रममा पनि यहि कुरा उठाउने छु, यसले नेपालको आथिृक विकासमा सहयोग पुग्ने छ ।’ चीनले आफूलाई संविधानसभाको चुनावपछि आर्थिक विकासका लागि सहयोग गर्ने वचन दिएको प्रचण्डले सुनाउनु भयो । उहाँले भन्नुभयो-’उत्पादन वृद्धि र विकासको लागि छिमेकीको सहयोग अनिवार्य छ, चाहे त्यो भारत चीन वा अरु कोहि होस् ।’

नागरिकहरुले आफुमाथि देशलाई बदल्ने आशा राखेको भन्दै उहाँले भन्नुभयो-’मलाई त्यसका लागि ८/१० वर्षको समय चाहिन्छ ।’ प्रचण्डले अवको संविधानसभा निर्वाचनमा मधेसी र जनजातिसँग मिलेर चुनाव लड्ने र वहुमत ल्याउने दावी गर्नुभयो । संविधानसभामा माओवादीको वहुमत आउने देखेर अन्य दलले विभिन्न बखेडा झिकेको उहाँको आरोप छ ।

यसअघि विहान प्रचण्डले ३ घण्टा सल्यान रुकुम र रोल्पाका माओवादीका जिल्ला स्तरिय कार्यकर्ताहरुलाई प्रशिक्षण दिएका थिए ।

प्रशिक्षणको क्रममा प्रचण्डले शान्तिप्रकृयापछि पार्टी विग्रिएको तथा पार्टी कार्यकर्ताहरु व्यक्तिवादी र जालिझेली भएको भन्दै सातौँ राष्ट्रिय महाधिवेशनपछि आफू पार्टीको सुधारमा लागिपरेकेा बताउनु भयो । उहाँले भन्नुभयो-’पार्टी शान्ति प्रक्रियापछि विगि्रएको र कार्यकर्ताहरु विगि्रएको पनि सत्य हो, अव सवै त्यसको सुधारका लागि लाग्नुपर्छ ।

माओवादी अध्यक्ष प्रचण्डले आफूले एमाले पार्टी छैन नभनेको भन्दै भन्नुभयो-’मैले त एमालेले कांग्रेससँग मिलेर चुनाव लडेमा सिद्धान्तत रहने छैन भनेको हो । मेरो भनाईको आसय एमाले नै छैन भन्ने हैन ।’