१६ वैशाख, काठमाडौं । नेपाली कांग्रेसले महाधिवेशन भएको साढे २ वर्षपछि १४ अञ्चल र काठमाडौँ उपत्यका समन्वय समिति गठन गरेको छ । सभापति सुशील कोइरालाले सोमबार समन्वय समिति संयोजक र सदस्यहरु तोक्नु भएको हो ।

काठमाडौँ उपत्यका समन्वय समितिको संयोजक रामकृष्ण ताम्राकार तोकिनु भएको छ । यस्तै मेची संयोजकमा महेन्द्र यादव, कोशी संयोजकमा पदमनारायण चौधरी सगरमाथा संयोजकमा केशवकुमार बुढाथोकी, जनकपुर संयोजकमा रामकुमार चौधरी, बाग्मती संयोजकमा रत्न शेरचन, नारायणी संयोजकमा रामचन्द्र तिवारी र गण्डकी अञ्चल समन्वय समिति संयोजकमा कृष्णचन्द्र नेपाली हुनुहुन्छ । यस्तै लुम्बिनी संयोजकमा सुरेन्द्रराज पाण्डे, धवलागिरी संयोजकमा एन.पी.साउँद, कर्णाली संयोजकमा मीन विश्वकर्मा, सेती संयोजकमा ज्ञानेन्द्रबहादुर कार्की र महाकाली संयोजकमा जीवनबहादुर शाही तोकिनु भएको छ ।

सभापतिले महाधिवेशनद्वारा पारित नीति तथा कार्यक्रमको संगठन सुुदृढीकरण कार्ययोजना अन्तर्गत परिच्छेद २० मा रहेको धारणा र नेपाली कांग्रेसको नियमावली, २०६८ को नियम २० बमोजिम अञ्चल समन्वय समिति तथा नियमावली, २०६८ को नियम २२ अनुसार काठमाडौँ उपत्यका समन्वय समिति गठन गर्नु भएको मुख्यसचिव चिनकाजी श्रेष्ठद्धारा जारी विज्ञप्तिमा उल्लेख छ ।