१६ वैशाख,काठमाडौँ । भारत भ्रमणमा रहनुभएका एमाओवादीका अध्यक्ष पुष्पकमल दाहाल ‘प्रचण्ड’ले जनता दल युनाइटेडका अध्यक्ष शरद यादवसँग भेटवार्ता गर्नुभएको छ ।

वार्ताका क्रममा प्रचण्डले राजनीतिक दलहरुको सहमतिमा संविधानसभा निर्वाचन प्रयोजनका लागि सर्वोच्च अदालतका प्रधानन्यायाधीशको नेतृत्वमा अन्तरिम चुनावी मन्त्रिपरिषद् गठन गरिएको र सो परिषद्ले तोकिएकै समयमा निर्वाचन गराउने बताउनुभएको प्रचण्डका सहयोगी शिव खकुरेलले जानकारी दिनुभयो ।

प्रमुख राजनीतिक दल निर्वाचन सम्पन्न गर्न प्रतिबद्ध रहेको जानकारी गराउँदै अध्यक्ष प्रचण्डले निर्वाचनलाई सफल बनाउन भारतीय नेता तथा जनताको महत्वपूर्ण सहयोग रहनुपर्नेमा जोड दिनुभएको थियो । नेपालमा लोकतन्त्रको स्थायित्वका लागि निर्वाचन हुनै पर्ने अध्यक्ष प्रचण्डको भनाइ थियो । एमाओवादी पार्टीप्रति कुनै पनि खालको अविश्वास नरहोस् भन्दै उहाँले नेपाललाई समुन्नत र आर्थिक रुपले सबल बनाउने आफूहरुको ध्येय रहेको स्पष्ट पार्नुभयो ।

भेटका अवसरमा जनता दल युनाइटेडका अध्यक्ष यादवले नेपालको स्थिरताका लागि आफूहरुको तर्फबाट जस्तोसुकै सहयोग उपलब्ध गराइने विश्वास दिलाउनु भएको थियो । उहाँले नेपालमा निकट भविष्यमा हुन लागेको संविधानसभाको निर्वाचनमा भारतीय राजनीतिक दल, सरकार र सरोकारवाला सबै पक्षले सहयोग गर्ने बताउनुभएको थियो । उहाँले निर्वाचनको विरोधमा रहेका राजनीतिक दलहरुलाई पनि विश्वासमा लिएर निर्वाचनमा सहभागी गराउनुपर्ने बताउनुभएको थियो । नेपालको गरिबी, असमानता, बेरोजगारीलाई हटाउन आर्थिक विकास र उन्नतिको आवश्यकता रहेको र त्यसमा सहयोग गर्न एमाओवादी अध्यक्ष प्रचण्डले गर्नुभएको आग्रहलाई आˆनो पार्टीले सकारात्मक रुपमा लिएको अध्यक्ष यादवले जानकारी दिनुभएको थियो । रासस