आइफोन निर्माता कम्पनी एप्पलको इतिहास खासै पुरानो छैन । स्टिभ जब्सले आफ्ना साथी स्टिभ बोज्नियाकसँग मिलेर आफ्नै बुवाको ग्यारेजमा स्थापना गरेको एप्पल कम्पनीले सन् १९७६ को अपि्रल १ का दिन आफ्नो पहिलो प्रडक्ट एप्पल वान कम्प्युटर निर्माण गरेको थियो । एप्पल वान ६६६.६६ डलरमा बिकेको थियो र लगत्तै स्थानीय बजारमा थप ५० वटा कम्प्युटरको माग आएको थियो ।

बुवाको ग्यारेजमा स्टिभले सुरु गरेको एप्पल आर्थिक अवस्था सुरुवाती दिनमा निकै दयनीय थियो र कम्प्युटर निर्माण गर्न जब्सले आफ्नो गाडि नै बेचिदिएका थिए । तर कम्प्युटरको दुनियामा नयाँ आयाम थप्दै आफुलाई स्थापित गर्न सफल भएपछि एप्पल कम्पनी सन् १९८५ मा आइपुग्दा २ अर्ब डलर मूल्य बराबरको कम्पनी बनिसकेको थियो । अहिले एप्पल कम्पनी विश्वको सबैभन्दा मूल्यवान कम्पनीको दोश्रो स्थानमा छ र यसका प्रडक्टहरु विश्वव्यापी रुपमै निकै रुचाइएका छन् ।

अरबौँ डलर सम्पत्ति भएको एप्पलले आफ्नो शान झल्काउन निकै भव्य मुख्यालय बनाउने योजना अघि सारेको छ र यसको रुपरेखा पनि सार्वजनिक भैसकेको अवस्था छ । यद्यपि अन्तरीक्षयान जस्तो रुपरेखामा बन्ने त्यो आलिशान महलको निर्माण कार्य सुरु भने भैसकेको छैन । क्यालिफोर्नियाको कुपर्टिनोमा बन्ने उक्त भवन ५ अर्ब डलरको लगानीमा बन्नेछ । २८ लाख वर्गफिट क्षेत्रफलमा यो भवन रहनेछ ।