फेसबुकका संस्थापक मार्क जुकरबर्गले आफ्नो नाममा रहेको फेसबुक कम्पनीको शेयर बेचेर कर तिरेका छन् । आफ्नो नाममा रहेको करोडौँ डलर बराबरको फेसबुकको शेयर वापत उठेको मोटो रकमको कर तिर्न जुकरबर्गलाई आफ्नो शेयर नै बेच्नुपरेको हो । शेयर बजारमा गएसँगै फेसबुक कम्पनीको शेयर मूल्य बढ्न नसकेको कारण जुकरबर्गलाई कर तिर्न पनि हम्मेहम्मे परेको हो ।

जुकरबर्गले ३ करोड डलर भन्दा बढिको शेयर बेचेको बताइएको छ । उनको फेसबुकमा अझैपनि १६ अर्ब डलर भन्दा बढिको शेयर छ । फेसबुकको शेयर मूल्यमा २९ प्रतिशतले गिरावट आएसँगै उनलाई ७ अर्ब डलर घाटा लागेको थियो । गएको वर्ष जुकरबर्गको सुरक्षाका लागि विमान चार्टड गर्न १२ लाख डलर खर्च भएको थियो भने उनले बोनस र तलब गरेर ७ लाख ७० हजार डलर भन्दा बढि कमाएका थिए ।