‘नेकपा एमाले एक नम्बरमा दर्ता भएको छ, अबको चुनावमा पनि यो पहिलो शक्ति बन्छ ।’ दल दर्तापछि एमाले उपाध्यक्ष वामदेव गौतमले अनलाइनखबरसँग भन्नुभयो-’अहिले पहिलो नम्बरमा दर्ता गरे पनि चुनाव चिन्ह र मतपत्रमा कुन दललाई पहिलो दोस्रो बनाउने भन्नेबारे पछि निर्णय गर्ने गरी आयोगले एमालेलाई पहिलो दलका रुपमा दर्ता गरेको हो ।’

आयोगले मंगलबारबाट दल दर्ताको आवेदन खोलेपछि बिहान ६ बजे नै एमालेको टोली दलबलसहित आयोगको गेटमा पुगेको थियो । त्यसपछि क्रमशः एमाओवादी र राप्रपा नेपालका नेता, कार्यकर्ताहरु पुगेका थिए । को पहिले आएको भन्दै एमाले र एमाओवादीवीच कार्यालय खोल्नासाथ विवाद भएपछि केहीबेर दल दर्ता प्रक्रिया अवरुद्ध भएको थियो । त्यसपछि बसेको आयोगको बैठकले एमालेलाई पहिलो, एमाओवादीलाई दोस्रो, राप्रपा नेपाललाई तेस्रो र नेपाली कांग्रेसलाई चौथो दलका रुपमा दर्ता गरेको हो ।

आयोगले गरेको निर्णयमा मतपत्रमा दलको नाम उल्लेख गर्दा अहिलेको निवेदनलाई आधार नमानी नयाँ निर्णय गरिने उल्लेख भएपछि एमाओवादीले एमाले भन्दा पछि दर्ता हुन मानेको हो । ‘कार्यालय खुलेपछि दर्ता हुने भए पनि बिहान पाँचैबजे नेताहरु आयोगमा आउनुभएछ । जसले पहिले दर्ता गर्छ, उसैको नाम मतपत्रमा पहिलो हुनुका साथै चुनाव चिन्ह पाइन्छ भन्ने भ्रमले गर्दा उहाँहरुले विवाद गर्नुभएको हो ।’ निर्वाचन आयुक्त इला शर्माले अनलाइनखबरसँग भन्नुभयो ।

दलहरुले आयोग परिसरमा झगडा गरिरहेका बेला पोखरामा रहनुभएका प्रमुख निर्वाचन आयुक्त नीलकण्ठ उप्रेतीले अनलाइनखबरसँग भन्नुभयो-’यो राम्रो लक्षण हो, यसले चुनाबको माहौल शुरु भएको संकेत गरेको छ ।, अब राजधानी बाहिर पनि यस्तै रौनक शुरु हुनुपर्छ ।’

प्रमुख आयुक्त उप्रेतीले अहिले जुन दलले जति नम्बरमा दर्ता गरे पनि चुनाव चिन्ह र मतपत्रमा दलको नाम चढाउनेबारे आयोगले निर्णय गरिनसकेको र पछि कसैको पनि चित्त नदुख्नेगरी निर्णय गरिने बताउनुभयो । ‘मतपत्रमा राखिने चुनाव चिन्हबारे अहिल्यै निर्णय गरिसकिएको छैन, अन्तरराष्ट्रिय प्रचलनलाई समेत ध्यान दिँदै कसैको चित्त नदुख्ने गरी पछि निर्णय लिइने छ, अहिले ज-जसले जति नम्बरमा दर्ता गरे पनि हुन्छ ।’ उहाँले भन्नुभयो ।

दल दर्ताका लागि निवेदन आह्वान गरेकै दिन एमाले र एमाओवादीवीच चर्काे विवाद भैरहँदा निर्वाचन आयोगमा भने दुईजना आयुक्तहरुको उपस्थिति थियो । विवाद समाधान गर्ने बेलामा आयोगमा अयोधीप्रसाद यादव र रामभक्त पीवी ठाकुरमात्रै हुनुहुन्थ्यो । प्रमुख आयुक्त उप्रेती र आयुक्त दोलखबहादुर गुरुङ र इला शर्मासमेत राजधानी बाहिर जानुभएकाले कार्यालयमा हुनुहन्थेन । ‘हामी जिल्ला-जिल्लामा आयोजित कार्यक्रममा भाग लिन बाहिर गएका हौं, आयोगमा दुई आयुक्तको नेतृत्व पर्याप्त छ ।’ उप्रेतीले अनलाइनखबरसँग भन्नुभयो ।

प्रमुख आयुक्त उप्रेती पोखराको कार्यक्रम सकेर बाग्लुङ जाँदै हुनुहुन्छ । उहाँ विहीबार मात्रै राजधानी आउनुहुने छ ।