१२ बैशाख,काठमाडौँ । संघीय मामिला तथा स्थानीय विकास मन्त्री विद्याधर मल्लिकले संविधान सभाको निर्वाचनको मिति छिट्टै घोषणा हुने वताउनु भएको छ । संविधानसभाको निर्वाचन सम्बन्धी विषयमा सरकारले दलहरुसँग छलफल गरेर दलीय धारणा लिने काम गरिरहेकाले छिट्टै निर्वाचनको मिति घोषणा हुने मन्त्री मल्लिकले वताउनुभयो ।

विहीवार राजधानीमा रिपोर्टस क्लब नेपालले आयोजना गरेको साक्षात्कारमा निर्वाचनको तयारीमा केही काम बाँकी रहेकोले निर्वाचनको मिति घोषणा नगरिएको स्पष्ट पार्नु भयो । उहाँले भन्नुभयो,’यो चुनाव गराउने कार्यसूचि लिएर बनेको सरकार हो । निर्वाचनको मिति घोषणा गर्न केही काम अझै बाँकी छ । सबै काम पुरा नभई मिति घोषणा हुँदैन । ‘ उहाँले संविधानसभा निर्वाचन सम्बन्धी अध्यादेश निर्वाचन आयोगले तयार पारेको र त्यस विषयमा सबै दललाई निर्वाचनमा ल्याउने विषयमा छलफल जारी छ । त्यसपछि मिति घोषणा हुन्छ । ‘

उहाँले अघिल्लो सरकारले गरेको राजनीतिक नियूक्तीमा ब्यवसायीक मानिस भए निरन्तरता दिने जानकारी दिनुभयो । यद्यपि उहाँले वर्तमान सरकारको ध्यान निर्वाचनमा केन्द्रीत भएकोले कसैलाई हटाउने र नियूक्त गर्ने काममा नलाग्ने दावी गर्नु भयो । मन्त्री मल्लिकले सरकार कुनै पनि नामको सेण्डिकेटको निर्देशनमा नचल्ने स्पष्ट पार्नु भयो ।

उहाँले भन्नुभयो,’सरकार कुनै सेण्डिकेटको छायाँमा छैन । चार दलको उच्चस्तरीय राजनीतिक समितिले भनेकै काम गर्नु पर्छ भन्ने बाध्यता यो स्वतन्त्र सरकारलाई छैन । सरकारले गर्नु पर्ने कर्तब्य कसैको दवावमा नपरि स्वतन्त्र ढंगले गर्छ । ‘ मन्त्री मल्लिकले दैनिक प्रशासन सञ्चालन गर्ने काममा सरकारले कसैको पनि कुरा नसुन्ने स्पष्ट पार्दै राजनीतिक कुरामा दलहरुका कुरा सुनेर सरकारले आफै स्वतन्त्र रुपमा उपयूक्त निर्णय लिने बताउनुभयो