१३ बैशाख, काठमाडौं । चुनावी तयारीबारे मन्त्रिपरिषद्का अध्यक्ष खिलराज रेग्मीले थ्रस होल्डसम्वन्धी विवादमा सहमति खोज्न प्रमुख चार दललाई आग्रह गर्नु भएको छ ।

उच्चस्तरीय राजनीतिक समितिका सदस्यहरुसँग शुक्रबार साँझ भएको छलफलमा रेग्मी दलहरुको तर्फबाट आएको माग तथा सुझावबारे ममेत जानकारी गराउनु भएको छ । ‘मन्त्रिपरिषद अध्यक्षले सरकार छिट्टै संविधानसभा सदस्य निर्वाचनसम्वन्धी अध्यादेश टुङ्ग्याउने र मिति घोषणा गर्न चाहन्छ भन्नु भयो’ रेग्मीको भनाई उदृत गर्दै प्रेस सल्लाहकार विमल गौतमले अनलाइनखबरसँग भन्नुभयो-’उहाँले दलहरुको तर्फबाट आएको सुझाव जस्ताको तस्तै राख्नुभयो र यसलाई बुझ्नु पर्‍यो भन्नु भएको छ ।’ अध्यादेश पारित हुन नसक्दा मिति घोषणामा ढिलाई भएको भन्दै रेग्मीले शीर्ष नेताहरुको ध्यानाकर्षण समेत गराउनु भएको छ ।

भेटमा चुनावी ऐन कानुन संशोधनबारे छलफल भएपनि कुनै सहमति नभएको तमपोलाका अध्यक्ष महन्थ ठाकुरले जानकारी दिनुभयो । दलहरुबीच सहमति हुन नसक्दा संविधानसभा सदस्य निर्वाचनसम्वन्धी अध्यादेश सरकारले राष्ट्रपतिसमक्ष पठाउन सकेको छैन ।

एमाओवादीसहितका साना दलहरुले थ्रेस होल्ड अर्थात समानुपातिकतर्फ १ प्रतिशत मत ल्याउनु पर्ने प्रावधानको विरोध गरेका छन् भने कांग्रेस र एमालेले समर्थन गरेका छन् । यस्तै सरकारविरुद्ध आन्दोलनरत दलहरुले समानुपातिक सिट संख्या पूरानै कायम गर्नु पर्ने माग गरेका छन् ।

यस्तै फैजदारी अभियोग लागेकाले निर्वाचनमा भाग लिन नपाउने प्रावधानको पनि माओवादीले विरोध गरेका छन् ।